22.01.2016 早茶去將軍澳明德商場一樓103號鋪 (百勝酒家)。 天時凍凍哋，開壺龍井茶，叫咗兩個點心。 一個(金風臘味飯)、(鮮蝦素翅餃)，呢兩樣嘢我去到必食嘅。 首先講 1.(金風臘味飯)$10.8元，料多臘味甘香好食！ 呢D肥膩野，耐唔中食吓無妨。 2.(鮮蝦素翅餃) 唔貴$14.8元，好多酒家都無呢個懷舊點心， 但該酒家特色好多老人家飲茶，好似老人院咁，揾個後生仔都難。 😯 聲明：本人与該酒家並沒有什麽利益，只是介紹給大家分享吓。 🙂
07.12.2015 中午茶，係朋友介紹一號銀海 [名苑酒家]，D嘢食幾好又唔貴，三人行去踩場。 試後真係唔錯喎！燉湯好味道，由其嗰套杯碟極靚，埋單多謝$354元個女請。 生拆極品蟹粉小籠包 紫米鬆化銀蘿脆腸粉 手生啄牛肉球 欖菜叉燒粒炒飯 養生黑蒜燉活海星湯 哈哈 ~~~ 下午又食，想唔肥都幾難！
08.11.2015 今日係 [立冬] 的日子，非常溫暖有28.7度，天氣好好。 由兒子揸車遊車河，首站去上環鳳城酒家飲早茶，佢最出名係 (高湯浸粉果) 必食幾好嘅。 🙂 跟住上太平山做吓老襯先，一上到去見到停車場大塞車，多謝每小時$38蚊，好貴喎！泊好車後就沿太平山行一個大運，約 3公里，幾好吖出咗身汗。 下午茶就去到筲箕灣東大街 (華星冰室)，佢比較出名，試吓踩吓場先，等咗 3個籌就入得去，真係好彩喇！ 我就叫馳名嘅 [校長厚多士+沙爹牛扒包]，(1) 食落校長厚多士，好有質數，巧巧食 [讚]，(2) 沙爹牛扒包D汁料好喊，真係比較差，總算試過了，呢間嘢明星效應比較大D。 聲明：本人与該小店並沒有什麼利益的！只係將事實告知大家分享吓。 校長厚多士
17.10.2015 下午13.30時去鴨寮街行街街，行至桂林街個肚有少少餓。 就入咗呢間 [新香園 ]，叫咗件必食嘅 (蛋牛治烘底)+熱奶茶， 食落件蛋牛治脆脆哋，牛肉蛋撈亂炒，熱辣辣好好食，好掂呀！ 埋單都係$31蚊咋，週時門囗有好多人要排隊等位的。 ~~~~~~~~~~~~~~~~~ 聲明：本人與 [ 新香園 ]，並沒有什麼利益的，只係有好嘢就同大家分享吓。 28.11.2015 14.00時，重臨新香園再番食回味的馳名( 蛋牛治烘底+熱咖啡 ) 。 今次令我太失望了，D蛋煎燶晒，點俾人食呀！ 真係 [ 讚 ] 壞了，我真係幫你唔到了，要將事實公布各天下。 幾好幾好 …. 都會有失手的一天，但門口仲係好多食客在排隊等位。小心D做呀！否則會走下玻的。
06.03.2015 上午1200-1430時。 在香港洲際酒店 – 欣圖軒嘆茶。 呢間野係米芝蓮2星喎！試吓先。 座位面向星光大道海傍，幾舒服嘅。 招呼就一流，食物都好有特色。 哈哈 …. 女兒請飲茶，埋單HSBC信用咭八折，折實$610元。 脆釀鮮蟹蓋 原隻鮑魚海鮮脆竽盒 葡汁海鮮籮蔔絲酥 黑松露帶子菠菜餃 孜然和牛生煎包 楊枝金露
04.01.2015新開張 PopCorn 2樓1-2鋪 今朝上午八點幾同太太去翠園試吓新野！ 去到都有人等位喎！不設搭枱，坐得幾得舒服。我叫咗三樣點心試吓， 1. 滛柱蒸臘味蘿蔔榚、2. 翡翠竹笙腸粉、3. 翻生咸魚肉片飯。 呢個飯最正，咸魚好靚又大舊有質數 [ 讚 ] ，打開壺蓋好快就有伙記冲水， 埋單$89蚊，好化算，我會多D幫襯佢。
下午茶 [ 紅樓 ] 剛11月份新開張的酒家，位於將軍澳皇冠假日酒店二樓商場3號鋪，屬於小型食肆。 四人去試試新嘢！茶錢方面$10位，如龍井同鐵觀音就要加多5蚊喎， 自己帶咗私家茶 ( 大紅袍 )。 叫咗D普通點心味道尚可，OK喇！落樓$220元。 男廁係用電門開關，內有一個坐廁二個尿槽，不過就真係細小小。
01.10.2014 舊式茶餐廳 – 也有它的生存空間 中午去舊區的深水埗 – 鴨寮街一帶行行，行咗個幾鐘頭，個肚有D餓，就入咗一間 [ 華南冰室 ] ，佢係一間舊式茶餐廳。 華南冰室保存了本地茶餐廳的環境，牆身卡位裝修懷舊，中間的圓檯還配搭入筍的木櫈，相信是多年來捧場的街坊擁躉，提供強烈的冰室情懷。 我點咗一個午餐。 (一) 火腿煎雙旦及油多士。 (二)义燒意粉。 (三) 熱檸檬水。 埋單$26 蚊相當超值，其它碟頭飯都係20幾蚊咋，有機會我會再去光顧的。
[ High Tea ] 下午茶 今天下午去尚德邨商場地下果間 [ A- 1 BAKERY & Cafe ]，試試個 High Tea 餐$98元，但要現金喎，都唔貴。 坐落後覺得好Q嘈，睇到三個女侍應生係喥 [ 嗶哩叭啦 ] ，高談濶輪，又夠中氣，大約維持20幾分鐘，真係頂佢唔順。 哈哈 …… 三個女人一個墟，真係冇錯。 係太太後面，三個女人一個墟，[ 嗶哩叭啦 ]，有圖為証。
唐茶點心 我由16歲幾出嚟社會工作，就開始上茶樓至今，幾拾年無間段的飲早茶，我通常飲茶的品種有 [龍井、普洱茶、鐵觀音] 再配合美味的點心，我點會厭吖！ 我每一天唔飲茶食過點心，我個心就羅羅亂，好似有一樣嘢未做的。 飲唐茶呢味嘢，唔係人人啱的，有些人早餐一定要西式茶餐才可以。 哈哈 …… 好在我的老伴口味同我一樣，每天早上一起嘆早茶。